Jau hai schletas novitads: Vossa figlia ha gì in grev accident d'auto ed ina persuna è morta. Per che Vossa figlia vegni puspè libra, stueis Vus pajar ina cauziun da 100'000 francs – e quai uschè spert sco pussibel!
Uschia in telefon ha ina dunna da 87 onns dal chantun Grischun survegnì avant intginas emnas. Da l'autra vart da l'apparat era ina persuna ch'ha dà da crair ch'ella saja ina procuratura publica. La seniora ha cartì ad ella e sinaquai surdà ils 100'000 francs avant sia chasa ad in um nunenconuschent. Pir memia tard ha ella s’accorschì ch'ella è vegnida tratga sur maisa vi.
Las autoritads èn infurmadas
Da quels trics fan savens uschenumnads clans, pia bandas – uschia era en il cass da la dunna da 87 onns, smina la polizia cantunala. La criminalitad da bandas saja vegnida actuala en il Grischun e la regenza ha schizunt prendì si quai sco in dals accents principals en lur nov program. Malgrà ch'ils clans na sajan anc betg uschè activs en il chantun, saja tuttina dad esser attents, di la schefa da la polizia criminala grischuna Barbara Hubschmid.
La polizia cantunala lavuri dapi quatter onns ensemen cun la polizia federala Fedpol per cumbatter la criminalitad da clans. Ed ins emprovi era da sa barattar or cun autras polizias chantunalas. Dentant, quant gronds èn ils donns che las bandas chaschunan en Svizra? Vegni in di uschè lunsch sco en Svezia, nua che la criminalitad da bandas è adina vegnida pli gronda ils davos onns? Quai ha il schurnal regiunal grischun dad SRF dumandà il criminolog Dirk Baier da la Scol'auta turitgaisa per scienzas applitgadas:
Igl è in privel real. Jau sun dentant da l'opiniun ch'i saja problematic da cumparegliar la situaziun cun l'aglomeraziun en Svezia.
La fatschenta da drogas va maun en maun cun la criminalitad da bandas
Era sch'il Grischun cunfinescha cun trais pajais, na possian ins betg dir ch'el saja perquai periclità spezialmain. Ozendi na possian ins betg dir che tschertas regiuns sajan pertutgadas pli fitg da criminalitad da bandas. Ozendi sajan las bandas dapertut activ, cunzunt là nua ch’i vegni consumà drogas e gliez vegnia dapertut sin il mund, di Dirk Baier. Era en il Grischun:
2,2 kilogramm cocain ha la polizia chantunala confiscà l’onn passà – 40% dapli che l'onn avant. E l'enviern passà duai la polizia era avair scuvrì in'organisaziun da drogas a Tavau che fascheva fatschentas cun la pulvra alva, sco quai che la Südostschweiz ha rapportà. Dentant, betg mo tar il consum da drogas stoppia la polizia avair avert ils egls, di il criminolog Dirk Baier. Mabain era cura ch'i va per publicaziuns uffizialas, per exempel sch'i vegn bajegià ina nova via. Tar da quels cass offreschian savens era bandas cun l'intent da pudair lavar daners. Il chantun enconuschi nagins cass d'ina banda ch'avess offrì en uschia in cas, scriva il departament responsabel sin dumonda dad SRF.
Pia: la criminalitad da bandas datti era en il Grischun. Ella è dentant betg uschè derasada sco en auters lieus. Tuttina tegnan polizia, politica e las autoritads avert ils egls. Uschia che da quels cass sco quel da la dunna da 87 onns ch'ha pers 100'000 francs na sa repetian betg uschè spert.