Quatter da las dumondas d'iniziativa valaivlas èn vegnidas integradas en la lescha chantunala da chatscha. Trais dumondas d'iniziativa duai il Cussegl grond percunter declerar sco dal tuttafatg u per part nunvalaivlas, perquai ch'ellas cuntrafan al dretg federal. Plinavant ha la regenza lantschà la consultaziun tar la revisiun parziala da la lescha chantunala da chatscha.
Valaivel dentant recumonda da refusar
Las suandantas dumondas d'iniziativa èn er ord vista da la regenza valaivlas. Ella propona dentant al Cussegl grond da recumandar a las votantas ed als votants grischuns da refusar ellas.
Dumondas d'iniziativa valaivlas
| DI2 | Scumond da la chatscha da guetta e da la chatscha cun traplas |
| DI3 | Scumond da la chatscha d'utschels |
| DI4 | Scumond general da chatscha a partir dal 1. da november per tut ils animals selvadis danor il tschierv |
| DI5 | Cumposiziun paritetica da la cumissiun da chatscha (chatschaders/protecturs d'animals per l'ina e nunchatschaders per l'autra) |
| DI6 | Limitas da l'alcohol en il sang cun ir a chatscha tenor la legislaziun davart il traffic sin via |
| DI7 | Examinaziun periodica da la qualificaziun per la chatscha e da la segirezza da culp sco er scumond da muniziun cun plum |
| DI8 | Scumond d'ir a chatscha cun uffants da main che 12 onns sco er scumond da motivar en scola per la chatscha |
| DI9 | Applicaziun restrictiva da sajettar singuls animals tras la surveglianza da chatscha en cas da donns da selvaschina extraordinaris |
La regenza renconuscha dentant che singulas dumondas da l'iniziativa èn motivadas en lur direcziuns. Ella ha perquai integrà las quatter dumondas d'iniziativa en ina furma adattada sco suonda en il sboz da consultaziun tar la revisiun parziala da la lescha chantunala da chatscha.
Dumondas d'iniziativa per part resguardadas
| DI2 | Scumond da la chatscha da guetta cun excepziun da la surveglianza da chatscha e da las chatschadras e dals chatschaders autorisads da l'uffizi da chatscha e pestga, e quai en il territori d'abitadi, tar manaschis agriculs en vischinanza da vitgs sco er tar singuls edifizis. |
| DI6 | Exclusiun da la chatscha en cas d'incapacitad d'ir a chatscha confurm a las prescripziuns pervia da l'influenza surproporziunala d'alcohol e da narcotics avant e durant la chatscha. |
| DI7 | Francaziun da l'obligaziun da tir per la chatscha tras l'obligaziun da relaschar normas da prestaziun liantas sin il stgalim da la lescha. E Introducziun da ballas e da ballins senza plum, uschespert che quai po vegnir responsà per motivs da segirezza e sin fundament da ponderaziuns da la protecziun d'animals. |
Dumondas d'iniziativa nunvalaivlas
| DI1 | Protecziun da vatgas-tschierv purtantas e manadras e da vadels-tschierv sco er da chauras-chavriel purtantas e manadras e dad ansiels-chavriel |
| DI4 | Scumond general da chatscha a partir dal 1. da november per il tschierv |
| DI5 | Occupaziun paritetica da l'uffizi da chatscha e pestga (chatschaders/protecturs d'animals per l'ina e nunchatschaders per l'autra) |
Pajar dapli per la patenta
Il medem mument ha la regenza grischuna era lantschà la consultaziun davart la revisiun parziala da la lescha chantunala da chatscha. Quella prevesa in augment dals custs da patenta sin 800 francs sco er duai la chatscha vegnir reaverta tranter ils 15 ed ils 31 d’october per maximal 4 dis, scriva la regenza.
RR novitads 12:00