Siglir tar il cuntegn

Header

video
Peter Peyer è il candidat per la regenza grischuna
Or da Telesguard dals 26.06.2017.
laschar ir. Durada: 2 minutas 3 Secundas.
cuntegn

Chantun Peter Peyer è il candidat da la PS

Peter Peyer è il candidat uffizial da la partida socialdemocratica grischuna per las elecziuns da la regenza l'auter onn. El ha survegnì 59,7% da las vuschs. Il cuntracandidat Andreas Thöny ha survegnì 40,3%.

En tut ha la partida social democratica retschavì ils davos trais mais 1’454 cedels da vuschar valaivels. 59.7% - respectivamain 868 vuschs ha Peter Peyer survegnì. Ses adversari Andreas Thöny ha survegnì 40.3% da las vuschs ed ha uschia pers la cursa. Il pli absolut è tar 728 vuschs.

Per l'emprima giada ha la PS grischuna fatg ina preselecziun per nominar ses candidat uffizial. Peyer ha persvas ils votants en nov da las regiuns grischunas. Sulettamain en las regiuns Landquart, Malögia e Partenz-Tavau ha Thöny gì la maioritad da las vuschs. Natiralmain saja el dischillus, ha ditg Andreas Thöny en ses pled suenter ch’i era cler ch’el n’è betg il candidat. El ha dentant era concedì a ses collega da partida ses sustegn cumplain en il cumbat electoral.

Pre-elecziuns empernaivlas

Sco Peter Peyer di, sajan las pre-elecziuns stadas fitg empernaivlas ed hajan dà ad el la pussaivladad da rimnar experientschas per il cumbat electoral che suondia ussa. El haja pudì plazzar ses arguments, sa preschentar en diversas regiuns e vegnir en contact cun votantas e votants. El saja gia uss en il modus d’elecziuns. Ch’il cumbat electoral cuzzia cun las pre-elecziun varga in onn na vesa l'um da 51 onns betg sco dischavantatg. Uschia haja el avunda temp per sa mussar e manar ensemen cun sia partida il cumbat.

Peter Peyer ha 51 onns, abitescha a Trin ed è da professiun secretari da sindicat. El è deputà dal Cussegl grond. Passa 3'500 persunas han pudì eleger il candidat.

Las elecziuns da regenza e parlament grischun èn ils 10 da zercladur 2018.

RR novitads 17:00

Artitgels legids il pli savens