Ch’el è pront per il titel da campiun europeic, ha Enrico Netzer demonstrà gia il venderdi. In sbratg or dal profund ha el dà cura ch’el ha taglià davent spert e precis ils 30 roms dal bist extra preparà per questa concurrenza. Ses contrahent ch’aveva cumenzà il medem mument sco el a sromar la planta speziala, aveva pir taglià davent la mesadad dals fists, cura ch’Enrico Netzer aveva gia finì da tagliar.
Mo esser spert, na vala nagut
Il temp na saja dentant betg exnum il criteri decisiv en questa disciplina, dat il giuven Surmiran da prest 22 onns d'entellir: «Mo esser spert na vala da principi nagut. Ti stoss era guardar d’esser uschè exact sco pussibel. Pertge mintga sbagl dat in chasti tar ils puncts.» Sbagls n’ha el quella giada fatg nagins, uschia ch’el è ton pli levgià da sia buna prestaziun tar sia emprima ed ultima disciplina da quest di.
Trenar, trenar ed anc ina giada trenar
Natiralmain sa chapescha quella buna prestaziun betg da sasez. Bain dependi era in zic dal di e da la furma en quest mument. Dentant per pudair insumma esser uschè spert e precis, stoppian ins cunzunt far ina chaussa: trenar, trenar ed anc ina giada trenar. E quai haja el era fatg, malgrà ch’el na saja betg pli uschè savens en il guaud sco student d’inschigner forestal. Sper il trenament corporal ed il survegnir in sentiment per la resgia a motor, na dastgian ins era betg tralaschar il trenament mental – in factur decisiv, tut tenor disciplina ed il squitsch ch’ins haja en tschertas situaziuns. En il team svizzer datti perquai era in trenader mental.
Mussar tge ch'ins sa e sperar
Per las quatter disciplinas che suondan anc la sonda, vul Enrico Netzer empruvar da betg vulair far memia bler, mabain da simplamain mussar tge ch’el sa e sperar che tut giaja bain. Avantatgs en la professiun na crai el betg da survegnir cun in titel da campiun europeic. Natiralmain dependi qua adina era dal patrun e co el valiteschia quai. Per ins sez crai el ch’in titel da campiun europeic, fetschia en mintga cas bain.
European championship in forestry skills (ECFS)
Il campiunadi europeic d’abilitads forestalas è in campiunadi tranter scolas forestalas da prest 20 pajais da l’Europa. Da mintga pajais sa participescha ina scola cun quatter students. Tge scolas che dastgan sa participar, vegn decidì en concurrenzas naziunalas. Il 16avel campiunadi europeic da ECFS è per l’emprima giada en Svizra. En tut cumbattan duas dunnas e 70 umens or da 18 differentas naziuns en tschintg differentas disciplinas per daventar campiuns europeics.
Las tschintg disciplinas:
- Tagl da pinar: Ina planta duai vegnir pinada aifer 90 secundas uschè datiers sco pussibel d’ina direcziun definida en ina distanza da 15 meters. I sa tracta qua be d’in bloc e betg d’ina planta entira.
- Midar chadaina: Tar ina resgia a motor vegna prendida davent la garnitura da tagl, vulvì la rodaglia e midà la chadaina uschia ch’ins po duvrar la resgia a motor per las duas disciplinas che suondan senza stuair midar insatge vid la resgia.
- Tagl cumbinà: Da dus bists da plantas vegnan tagliadas davent duas rudellas da lain. Quellas dastgan esser tranter 30 ed 80 mm. Qua ston ins l’emprim resgiar fin entamez il bist da sutensi e lura tagliar atras da surengiu. Pli exacts ch’ins è e pli blers puncts ch’ins survegn.
- Tagl da precisiun: Da dus bists da plantas vegnan tagliadas davent duas rudellas da lain. Quellas dastgan esser tranter 30 ed 80 mm. La finamira è da tagliar atras il lain da surengiu senza che la platta da lain sin la quala ils bists schain, vegnan donnegiads da la resgia a motor.
- Sromar: 30 lains pitgads viaden sco roma d’ina planta en in bist ston vegnir sromads cun la resgia a motor uschè spert sco pussibel senza ch’i varga ora anc in toc dal rom or dal bist.
RR actualitad 08:00