La PPS ha uss 2 mandats a Berna. Da nov represchenta Magdalena Martullo-Blocher il Grischun a Berna. Heinz Brand è vegnì reelegì cun il meglier resultat da 23’183 vuschs.
Martin Candinas da la Partida cristian-democratica cuntanscha il segund meglier resultat. Ed er reelegida vegn Silva Semadeni da la Partida socialdemocrata cun 14’863 vuschs.
E sco nov cusseglier naziunal è vegnì elegì Duri Campell da la Partida burgaisdemocrata, quai cun 12’570 vuschs.
Betg reelegì è vegnì Josias Gasser da la Partida verd-liberala. El cuntanscha 12'990 vuschs.
Ils resultats da las elecziuns per ils 5 elegids:
- Heinz Brand (PPS) - 23'183 vuschs
- Martin Candinas (PCD) - 21'782 vuschs
- Magdalena Martullo-Blocher (PPS) - 18'901 vuschs
- Silva Semadeni (PS) - 14'863 vuschs
- Duri Campell (PBD) - 12'570 vuschs
In fotofinish per il 5avel sez
Igl è stà in fotofinish a las elecziuns 2015 – quai han ins udì bain savens da differents politichers. PLD ni PPS? Tgi va cun il 5avel sez? Uschè stretg n’èsi dentant betg stà. Er senza la partida dals liberaldemocrats patriotics dal giuven da Tavau Luca Heinrich avessi numnadamain tanschì a la PPS per il segund sez.
Il quint
- 133’987 vuschs ha la colliaziun da glistas dal center cun PLD, PCD e PBD fatg. Partì tras ils trais sezs giavischads dat quai 44’662 vuschs.
- 90’091 ha la colliaziun da la PPS cun la partida da Luca Heinrich fatg. Partì tras dus dat quai 45’045.
- Senza las 673 vuschs da la glista da la partida dals liberaldemocrats patriotics avess la PPS fatg 89’418 vuschs.
- Part’ins uss quellas 89’418 vuschs tras ils dus sezs, vegnan ins sin 44’709. E quai è dapli che las 44’662 da la colliaziun.
- Pia da principi avessan schizunt mo 89’326 vuschs tanschì a la PPS, partì tras dus dat quai numnadamain precis 44’663 vuschs. Exact ina dapli che tar la colliaziun dal center.
Cler, igl è stà stretg. In motiv da dumbrar suenter vuschs n’è quai dentant betg, uschia Walter Frizzoni da la chanzlia chantunala. Tenor el na datti nagina basa legala da dumbrar suenter vuschs tar elecziuns naziunalas, sulet sch’igl è stà stretg. Il resultat final vegn lura publitgà en il figl uffizial. E lura pon ins far recurs, i sto dentant dar indizis per irregularitads. E quai na datti enfin uss betg, uschia Walter Frizzoni.
RR novitads 18:00