Siglir tar il cuntegn

Header

cuntegn

Chantun Luf: Chantun duai survegnir dapli cumpetenzas

Uss èsi uschia che la Confederaziun sto dar la lubientscha al chantun da sajettar in luf. Quai duai sa midar sch'i va tenor il cusseglier dals chantuns Stefan Engler. El vul dar dapli cumpetenzas als chantuns e pli pauca birocrazia.

En il decurs da las davosas trais emnas ha in luf, probabel il M75 stgarpà sis nursas e blessà ulteriuras sisum la Surselva. Sajettar il probabel delinquent n'è dentant betg pli pussaivel cunquai che la lubientscha da sajettar che la Confederaziun aveva dà è currida giu la dumengia passada. Quai exempel saja in bun mussament che lufs na prendian nagin resguard sin ordinaziuns e cumonds d'autoritads, uschia il cusseglier dals chantuns Stefan Engler. Las proceduras per dar lubientschas da sajettar sajan bler memia lungas e cumplitgadas.

Dapli cumpetenzas per chantuns

La lescha ch'è en revisiun stoppia dar dapli cumpetenza e dapli responsabladad als chantuns en chaussas luf. Uschè ditg sco il dumber dals lufs creschia na dettia quai nagina raschun che la Confederaziun haja da survegliar ils chantuns, cunzunt betg in chantun sco il Grischun che haja ramassà experientschas e sappia sco ir enturn cun lufs da problem.

audio
Saira: sistem da sajettar il luf è problematic – reacziuns Stefan Engler
ord Actualitad dals 26.05.2017.
laschar ir. Durada: 2 minutas 43 Secundas.

La stad vegn uss il messadi da la revisiun da la lescha da chatscha federala dal Cussegl federal. L'atun vegn quest messadi lura en il parlament. Là vegnia Stefan Engler lura a s'engaschar per dapli cumpetenzas per ils chantuns.

Artitgels legids il pli savens