Linard Bardill pretenda ch'i vegna fatg urden en l'Uffizi da cultura. Martin Jäger saja cusseglià mal ed i regia in'atmosfera da tema. Quai en mintga cas confermian ad el quest dis pliras persunas ch'han bandunà l'uffizi u che hajan stuì bandunar quel. En spezial vegn menziunada la manadra da l'Uffizi da cultura Barbara Gabrielli, sco er il cussegliader extern Peter Hinnen.
150 enfin 200 persunas èn stadas preschentas a la demonstraziun nua ch'il chantautur e co-iniziant da l'acziun Kunzt first ha fatg questas pretaisas, sa basond sin in artitgel dal Tagesanzeiger dals 21 da zercladur. Tranter auter èn sa radunadas persunas enconuschentas da la scena d'art grischuna, ma era internaziunala. Stads preschents èn tranter auter Roman ed Aleksandra Signer, il scriptur grischun Reto Hänny, il chantadur da Cuira Walther Lietha, Vera Kappeler, Daniel e Robert Hunziker e Luciano Fasciati.
Post vacant
Suenter che Martin Jäger ha sistì sia decisiun è il post dal directur dal museum d'art vacant. Tenor infurmaziuns da Martin Jäger na turna Stephan Kunz betg al timun dal Museum d'art Grischun. Enfin che l'organisaziun è analisada è la plazza vacanta.
Act da solidaritad
Per Stephan Kunz è la demonstraziun in bel act da solidaritad, el na veglia dentant da far nagut cun l’organisaziun ha el sincerà ed ha sin dumonda er betg savì respunder, sch’el vegnia ad esser da la partida. Entaifer 24 uras èn prest 1'500 persunas sa registradas online sin aktionbkm.ch per mussar lur solidaritad.
Lubientscha
La lubientscha da la polizia dal commerzi per l'acziun da protest, durant la quala persunas activas sin il champ cultural sco er persunas interessadas a la cultura vulan pretender da reinstituir Stephan Kunz sco directur dal museum d'art, è avant maun.
RR novitads 06:00++
