Siglir tar il cuntegn

Header

cuntegn

Chantun Hasch e cocain en l'armada dal WEF

La polizia militara ha traplà al WEF a Tavau plirs schuldads ch'eran vi dal consumar drogas. In pledader da l'armada ha confermà in rapport dal Corriere del Ticino.

A Tavau èn millis schuldads en acziun per proteger il Forum mundial d'economia. Betg tuts piglian apparentamain tuttina serius lur pensum. La polizia militara ha traplà dudesch schuldads ch'eran vi dal fimar hasch. Tschintg dad els hajan ultra da quai consumà cocain, ha ditg Stefan Hofer, il pledader dal stab directiv.

La polizia militara aveva survegnì in avis ord atgna retscha. Sinaquai ha ella controllà la truppa. I sa tracti cunzunt da schuldads tessinais e da las valladas talianas dal Grischun. Ils schuldads ch'avevan consumà cocain èn vegnids tramess per immediat a chasa. Per els vegn quai a dar consequenzas giuridicas.

RR novitads 12:00

Artitgels legids il pli savens