Siglir tar il cuntegn

Header

cuntegn

Chantun Betg pli paucas regiuns da premias

La regenza grischuna n'è betg d'accord da reducir las regiuns da premias da las cassas da malsauns. Il Departament federal da l'intern vul per l'ina reducir las regiuns da premias en il Grischun da trais a duas e per l'autra betg pli definir quellas tenor vischnancas, mabain tenor regiuns politicas.

La nova repartiziun chaschunass in augment nungiustifitgà da las premias en numerusas vischnancas ruralas. Quellas han dischavantatgs areguard il provediment medicinal da basa. Quai scriva la regenza en sia posiziun tar la midada da l'ordinaziun dal Departament federal da l'intern (DFI). Lez propona da reducir las regiuns da premias en il Grischun da trais sin duas e da definir questas tenor las regiuns politicas e betg tenor las vischnancas.

Grondas differenzas tranter las vischnancas

La regenza fa attent ch’i dettia grondas differenzas tranter las singulas vischnancas entaifer ina regiun areguard l'accessibladad a las prestaziuns medicinalas. Uschia tutga per exempel la vischnanca da Tschiertschen/Praden a la medema regiun da premias sco la citad da Cuira (regiun Plessur) e las vischnancas da Buseno, da Castaneda e da Rossa en la Val Calanca perifera tutgan tar la medema regiun sco las vischnancas da Grono e da Roveredo (regiun Moesa). L'Uffizi federal da sanadad publica sto vegnir incumbensà correspundentamain d'eruir ils custs da sanadad vinavant tenor vischnancas e d'attribuir las vischnancas a las regiuns da premias tenor la media dals custs.

Cuntraproposta da la regenza

Sch'il Departament federal da l’intern insista sin la reducziun da las regiuns da premias, propona la regenza da mantegnair en mintga cas la differenza maximala admissibla da las premias da 15% tranter la regiun 1 e la regiun 2, sco ch'ella è fixada en l'ordinaziun vertenta. Questa differenza correspunda circa a las differenzas da las premias actualas da la gronda part da las assicuranzas tranter las duas regiuns en il Grischun.

RR novitads 11:00

Artitgels legids il pli savens