Dapli muvel grond e la tema dal luf
Tenor Duosch Städler, il president da l’Uniun d’allevaturs da nursas dal Grischun, sajan las structuras dals bains purils sa midadas ils ultims onns. Pli baud aveva quasi mintga pur era intginas nursas. Ma cun las perscripziuns adattadas e las stallas novas, sajan ils purs sa concentrads sin la muaglia gronda.
Era ils animals da rapina ch’èn sa derasads ils ultims onns en il Grischun hajan procurà per la digren da las muntaneras da nursas. Enstagl d’investir en la protecziun da la muntanera, saja quai pli simpel per in pur da hobi da dar si la muntanera.
Stallas vidas ed alps en decadenza
I saja grev da motivar purs giuvens da tegnair nursas. Il temp da lavur saja intensiv. Ma betg mo las stallas restan vidas, mabain era las alps. Las pastgiras creschan en, sch’ellas na vegnan betg pasculadas da las nursas. Ils davos onns sajan vegnidas alpegiadas en il Grischun da quai da 50’000 nursas. Ca. 10% da questas derivan d’auters chantuns. Tenor il president da l’Uniun d’allevaturs da nursas dal Grischun saja quai la cifra minimala.
Il Grischun, il chantun da las giaglinas?
Dapi il 2003 datti 50% dapli giaglinas en il Grischun. Il dumber è s’augmentà da 44’400 sin passa 94’000 giaglinas. Il pli grond giagliner datti a Grüsch en il Partenz. Il pur Beno Niggli ha dapi il 2009 ina tratga da giaglinas ch'ovan. Duas giadas ad onn venda el l’entir giaglinom e trai novas giaglinas. Ils pulschains cumpra el en Svizra Centrala. El tira si quels enfin ch’els han 18 emnas e venda lura per ordinari l’entir triep ad in producent d’ovs.
Avant otg onns cura che Beno Niggli era sa decidì per la tratga gronda da giaglinas, era el in da dus manaschis en Svizra. Oz dettia quai tranter dudesch fin quindesch allevaturas uschè da talas dimensiuns en Svizra.
Il boom da tegnair giaglinas en il Grischun declera il pur da Grüsch cun il fatg ch’ì saja simpel da tegnair giaglinom e ch’ils ovs da Bio sajan tschertgads.
RR actualitad 11:00