Siglir tar il cuntegn

Header

cuntegn

Exteriur Prince

Ils 21 d'avrigl 2016 è Prince mort. Cun el è mort ina da las figuras las pli marcantas da la musica pop. Sco paucs auters ha quest chantant, ghitarrist e producent american savì cumbinar erotica e tuns. Sia mixtura da funk, rock e jazz ha influenzà entiras generaziuns dapi ils onns ’80.

Perlas

Avrir la box Serrar la box

Cun Prince è mort ina da las figuras las pli marcantas da la musica pop. Sco paucs auters ha quest chantant, ghitarrist e producent american savì cumbinar erotica e tuns, e sia mixtura da funk, rock e jazz ha influenzà entiras generaziuns dapi ils onns ’80. Beni Vigne preschenta ina rimnada da ses pli gronds hits, alternond cun inquala truvaglia.

I era gievgia, ils 21 d'avrigl las 9:43, cura ch’il Sheriff da Carver County a Minnesota aveva survegnì in clom da telefon: «Nus duvrain subit in’ambulanza» aveva detg in um, «nus avain insatgi, ch’è sa pers vi.» – «Tgenina è l’adressa?» – «Nus essan en chasa da Prince.»

audio
Bunura: Discurs tar la mort dal star Prince
ord Actualitad dals 22.04.2016.
laschar ir. Durada: 3 minutas 10 Secundas.

Paucas uras pli tard conferma la polizia, che Prince è mort en la vegliadetgna da 57 onns en sia residenza Paisley Park.

Save shot u grippa - uffizial n'è anc nagut

La versiun uffiziala è anc adina quella ch’el laschava sa tractar là pervi dad ina grippa. Tenor rapports da medias haja Prince dentant survegnì suenter in concert ina squitta speziala, in uschè-numnà save shot. Quai vegn squittà en il cas dad ina surdosa dad opiats.

In portrait da Prince.
Legenda: Keystone
Spetgai anc in pèr dis, avant che vus sfarlattais vossas uraziuns.
Autur: Prince durant ina party la fin d'emna passada.

Uffizialmain na datti anc naginas confermas per questas infurmaziuns. La polizia en il stadi da Minnesota intercurreschia il cas, ha ditg in represchentant dal circuit Carver Conunty envers la gasetta «Minneapolis Star Tribune».

Prince Roger Nelson è naschi ils 7 da zercladur 1958 a Minneapolis. Gia durant la High School giugava el en ina band e sia reputaziun sco uffant schenial ha lura purtà in contract da registraziunda musica gia avant ses 20avel anniversari.

In dals pli ingenius e versads musicists da ses temp

La fin dals onns 70 è Prince s'etablì sco favurì dals crititgers e sco in dals pli ingenius e versads musicists da ses temp. Surtut ils onns 80 ha el procurà per in hit suenter l'auter, tranter auter cun «Purple Rain», «When Doves Cry» u cun «1999».

En sia musica cumbinava Prince differents stils da musica, tranter auter funk, soul, R&B, rock e pop. En sia carriera è el vegnì onurà cun 7 Grammys ed ha gudagnà in Oscar per il soundtrack dal film «Purple Rain», nua ch'el ha sez giugà la rolla principala. Ch'el procurava adina danovamain per surpresas mussa er in concert da surpresa da l'october 2009 a Paris (mira sura).

Il mund da la musica è trists

La mort dal star dal pop ha schoccà il mund da la musica. En las medias socialas sa mussan blers amis e collegas trists da la mort da Prince. «El ha midà il mund, in visiunari tge sperdita» scriva Madonna via Twitter. Era ulteriuras persunas èn sa mussadas consternadas e tristas da la mort dal musicist.

Obama consternà da la mort da Prince

Il president american Barack Obama è sa mussa en cordoli per la mort dal musicist da pop Prince. Il mund haja pers ina icona creativa, paucs musicists hajan influenzà il mund da la musica da pop uschè marcant sco Prince, scriva Obama en ina communicaziun. El Obama ha sincerà sia condolientscha a la famiglia a la band da Prince.

RR novitads 20:00++

Artitgels legids il pli savens