Siglir tar il cuntegn

Header

cuntegn

Exteriur Lumbardia metta grond pais sin traffic public

Per l’exposiziun mundiala a Milaun che cumenza venderdi vegnan spetgads passa 20 milliuns visitaders. Per cuntanscher l’areal da l’ExpoMilano pon ins ubain prender la metro, il tren, il bus u ir cun l’agen auto sin in dals trais parcadis a l’ur da l’exposiziun e vegnir a quella cun bus pendularis.

L’interpraisa feroviaria TreNord investescha passa 520 milliuns euros per cumprar novs trens. Fin tar l’avertura da l’ExpoMilano duain esser 40 da total 63 novs trens en funcziun. Cun quell’investiziun vul ins suttastritgar quant ferm che la regiun Lumbardia craja en il transport public.

audio
Bunura: Lombardia metta grond pais sin mezs publics
ord Actualitad dals 28.04.2015.
laschar ir. Durada: 4 minutas 15 Secundas.

La «macchina» è status da simbol

Per il Talian n’èn ils mezs publics dentant betg uschia enconuschents e duvrads sco per exempel en Svizra. Il simbol da status per mintga Talian è e resta «la macchina» – l’auto.

Per tut quels che vegnan cun l’auto a l’ExpoMilano datti pliras plazzas da parcar uffizialas var 10 km davent da l’areal da l’exposiziun. Ellas vegnan gestiunadas e porschan in service d’in bus da shuttle che maina ils visitaders fin tar il portal da l’entrada.

Er cuntanschibel cun l'aviun

Plinavant è la Lumbardia er cuntanschibla sin la via aviatica. Las colliaziuns dals eroports da Malpensa, Linate e Bergamo cun tren e bus èn er garantidas.

Dentant n’èn betg tut las colliaziuns prontas per il di d’avertura da l’Expo il prim da matg 2015.

Artitgels legids il pli savens