Il pli impurtant:
- Attatga Cambrils: En il lieu da vacanzas Cambrils èn la notg set persunas vegnidas blessadas tras in auto. La polizia ha sinaquai sajettà giu tschintg persunas suspectadas. Ils attentaders purtavan para tschintas cun material explosiv.
- Attatga Barcelona: La gievgia saira circa a las tschintg è in auto da furniziun charrà en ina fulla da glieud sin «Las Ramblas» a Barcelona. Tenor indicaziuns da la regenza regiunala da la Catalugna èn almain 13 persunas mortas e dapli che 100 persunas blessadas. Pliras perditgas discurran da scenas caoticas e da panica. Il manischunz è para fugì a pe. La polizia quinta che quai dettia in connex tranter ils attentats.
- Attentaders: L'identitad dals attentaders n'è anc betg sclerida. In um dal Maroc ed in um Spagnol èn vegnids arrestads. Il manischunz da la camiunetta è dentant anc adina a la fugia. La milissa da terror stadi islamic è sa mussada responsabla per l'attatga.
- Las unfrendas: Bleras da las unfrendas sin «Las Ramblas» vegnan ord da l'exteriur. Burgais ord la Svizra n'èn para betg tranter ils morts e blessads, rapporta il servetsch civil.
- Connex cun Alcanar: Ad Alcanar en il sid da la Spagna era quai vegnì la mesemna tar ina explosiun. Ina persuna era morta. Tenor la polizia ha l'explosiun in direct connex cun las attatgas a Barcelona. Para saja material explosiv vegni preparà ad Alcanar, uschia il schef da la polizia.
- Connex cun autras attatgas: L’act da terror a Barcelona haja pliras parallelas cun las attatgas da Nizza, Berlin ni Londra nua ch'attentaders èn medemamain charrads cun autos en fullas da persunas.
RR novitads 06:00+