Pliras persunas sajan blessadas, ha declerà il president da la provinza Pescara nua ch'il hotel Rigopiano stat. La lavina saja vegnida effectuada d'in terratrembel ch'aveva scurlattà la regiun la mesemna suentermezdi.
Las forzas da salvament han chattà ina bara. Ellas quintan dentant cun dapli unfrendas. L'acziun da salvament vegnan engrevgiadas tras in stemprà e la blera naiv. En pli è il privel da lavinas en la regiun è tenor las autoritads localas vinavant grond.
Persunas en l'hotel a Farindola avevan clamà per agid via SMS. «Nus schelain», hai gì num en in messadi. L'hotel saja cumplettamain sutterrà. Pervia da la blera naiv n'han las forzas da salvament be pudì cuntanscher la regiun cun fadia e suenter uras. Ina part dal hotel saja crudà ensemen hai gì num. Il privel per ulteriuras lavinas saja grond. La regiun è gia dapi dis confruntada cun nevaglias.
Pliras 100 persunas èn isoladas
Betg ils novs terratrembels, mabain la naiv saja il problem grond en la en l'Italia Centrala. Quai ha ditg il president communal d'Amatrice, in dals lieus pertutgads. Fin a dus meters naiv impedeschian che las autoritads possian sclerir, schebain i haja dà donns u blessads. Pliras 100 persunas sajan isoladas dal rest dal mund e n'hajan betg electricitad.
En la regiun enturn Amatrice avevi dà l'avust passà in grev terratrembel ch'aveva chaschunà enturn 300 morts.
Mesemna avantmezdi hai dà en la medema regiun quatter novs terratrembels cun fermezzas da tranter 5,3 e 5,7 sin la scala da Richter. Anc a Roma ch'è radund 100 kilometers davent dad Amatrice hajan ins sentì las stremblidas. La metro a Roma ha stuì vegnir evacuada. Millis da scolars èn vegnids tramess a chasa.
RR novitads 18:00 / 08:00