Set onns suenter la disgrazia da la Loveparade a Duisburg sto la disgrazia tuttina vegnir elavurada avant dretgira. Il 2010 èn 21 persunas mortas d’ina panica da massa a la parada. Passa 600 èn vegnidas blessadas. La dretgira da Duisburg aveva decis da na betg accusar las 10 persunas che duain esser responsablas, quai perquai che las schanzas sin success sajan memia pitschnas. Qua han la procura publica e divers accusaders accessorics reclamà.
La dretgira superiura è da l'avis ch'ina sentenzia da las persunas pervi da mazzament per negligientscha e blessuras corporalas tras negligientscha saja probabla.
Las retschertgas hajan mussà ch'il motiv probabel per la catastrofa sajan stadas la dimensiun mengia pitschna dal lieu e che las entradas e sortidas na sajan betg stadas concipidas bain durant la Loveparade 2010.
RR novitads 15:00