Chuck Berry è naschì il 1926, e cun 16 onns ha el emprendì da sunar la ghitarra. Davent dal 1953 ha el sunà en ina gruppa, e dus onns pli tard ha sia ‘Chuck Berry Combo’ nudà l’emprim success cun ‘Maybellene’. Questa chanzun è stada sin plazza tschintg da la parada da hits Billboard.
Cumponist da plirs semperverds
Chuck Berry ha gì success davent dals onns 50, impressiun ha fatg sco el ha sunà la ghitarra electrica sco era sias cumposiziuns. Sias chanzuns sco ‘Johnny B. Goode’, ‘Sweet Little Sixteen’ e ‘Roll Over Beethoven’ valan sco classichers. Berry ha survegnì in Grammy per sia ovra da la vita, ed è stà in dals emprims musicists che ha fatg part a la ‘Rock and Roll Hall of Fame’.
Mick Jagger engrazia
Sonda, ils 18 da mars, mora Chuck Berry en ses da chasa. Il mund da musica è ina giada dapli consternì da la perdita d'in da ses piuniers. Mick Jagger, il chantadur dals Rolling Stones, scriva sin Twitter ch'el saja uschè trist d’udir che Chuck Berry è mort. El engrazia per tut la musica che haja purtà inspiraziun. Chuck Berry haja purtà glisch en lur onns da giuvenils, e laschà sa siemiar da daventar musicist. Era auters musicists sco Bruce Springsteen e Lenny Kravitz avevan engrazià sur las medias socialas a Chuck Berry.
Plans per il futur
Pervi da la vegliadetgna n'è Chuck Berry betg pli stà da vesair uschè savens sin tribuna ils davos onns da sia vita. A chaschun da ses 90avel anniversari, l'october 2016, aveva il musicist dentant annunzià, da vulair publitgar in nov album. Quai fiss l'emprim nov album da Chuck Berry dapi bunamain quatter decennis. Era sche Berry na vegn betg pli a pudair battegiar quest album – il nov album cun il num «Chuck» cumpara il zercladur 2017
RR novitads 06:00
