RTR+ sa basa sin HbbTV (Hybrid broadcast broadband TV). Questa tecnologia cumbinescha televisiun digitala cun l’internet. A moda sumeglianta al teletext vegnan mussadas infurmaziuns supplementaras da l’emettur da TV.
Cun RTR+ sa laschan consumar (sur il purtret da TV e cun smatgar il buttun cotschen dal telecumond) novitads regiunalas, naziunalas ed internaziunalas actualas - per part cun maletgs - e resultats da sport. Era las previsiuns da l’aura cumparan en preschentaziun grafica. Sin il visur grond pon ins alura guardar las emissiuns gia emessas sco Telesguard, Cuntrasts, Cuntrasts discurs, Controvers, Minisguard. Il program da Radio Rumantsch ed ulteriuras purschidas da video sco livestreams e videos da Battaporta vegnan integradas en il decurs da l’onn en RTR+.
RTR+ vegn emess sur ils emetturs da HD da SRF, RSI e RTS. Tgi che vul profitar da RTR+, dovra in apparat da televisiun (Smart-TV) che sustegna la tecnologia da HbbTV, in attatg da televisiun correspundent ed ina colliaziun d'internet da spectrum lartg. Apparats da TV pli vegls u era moniturs plats cun attatg da HDMI pon vegnir equipads cun ina HbbTV-Set-Top-Box u in receptur digital tar la Smart-TV.
Tut ils producents d’apparats impurtants sustegnan HbbTV. En l’entira Europa offreschan adina dapli emetturs da TV quest servetsch supplementar. Sper SRF p.ex. ARD, ZDF, ORF, Pro Sieben, RTL, 3sat, Arte etc.