S. Bernadetta – in’icona da la baselgia catolica

A Lourdes è Nossadunna cumparida 1858 a la matta da 14 onns Bernadetta. Dapi lura è Lourdes enconuschent e vala oz sco in dals pli renumads lieus da pelegrinadi dals catolics.

Ma la via è stada lunga e spinusa, cunzunt per Bernadetta che ha gì in dir cumbat da persvader ses ambient ed il clerus da sias visiuns. Bernadetta è naschida 1844 en ina povra famiglia ed è adina stada malsauna. Cun 22 onns va ella en claustra a Nevers nua chella è morta en la vegliadetgna da 35 onns. Sias reliquias miraculusamain intactas fin il di dad oz, èn en in vaschè da vaider a Nevers ed attiran oz blers pelegrins.

Gievgia che vegn, ils 7 da fanadur, èsi exact 150 onns che Bernadetta era ida en claustra e perquai datti a Nevers in grond program da festa cun ina messa dal nunzi papal en Frantscha, archuvestg Luigi Ventura.

Redacziun: Gabriela Desax

Contribuziuns