Theresa May

La nova primministra da la Gronda Britannia è Theresa May. Damaun mida ella en la Downing Street 10. Ma tgi è Theresa May?

Portrait dad elecziun da Theresa May.
Legenda da maletgs: La proxima primministra da la Gronda Britannia. Keystone

Theresa May ha 58 onns ed è il mument anc ministra da l'intern. Ella è commembra dals Tories conservativs e vegn a partir da damaun er ad esser la schefa da la partida.


Brexit: Theresa May era encunter il Brexit, steva da vart da David Cameron. En il cumbat da votaziun è ella dentant sa tegnida enavos. Tuttina di ella: Brexit vul dir Brexit. Cun ella sco primministra na vegni betg a dar in segund referendum.


Migraziun: Qua è Theresa May ina dira nusch. Sco ministra da l'intern ha ella stuì realisar las empermischuns da David Cameron da sbassar l'immigraziun sut 100'000 persunas ad onn. May ha reagì rigurus: per savair sa domiciliar ston persunas che n'èn betg da la UE gudagnar 35'000 pfund, 8'000 pfund dapli che la media dals Brits.


Segns da dumondas: Theresa May era bain encunter il Brexit, è dentant s'exprimida pliras giadas che la Gronda Britannia duess sortir da la convenziun dals dretgs umans europeica. Ma May è era s'exprimida per l'egualitad e s'engaschada per la lètg tranter omosexuals.


Sia carriera: Dapi ils 2010 è Theresa May ministra da l'intern. Quest uffizi vala sco «killer» per ina carriera. Ma a May n'ha quest uffizi betg fatg donn. Nagin era pli dietg ministra da l'intern che ella. May ha studetgà ad Oxford e lavurà blers onns tar la banca naziunala da la Gronda Britannia. May vala sco politicra rigurusa ed energica che vegn gugent cumparegliada cun Margaret Thatcher.

Theresa May è maridada, ha dentant nagins uffants.

Autur/a: cc