Il bitsch

Dar bitschs è sanadaivel - i duai rinforzar il cor ed il sistem d'immunitad e tut tenor intensitad dal bitsch dovra il bitschar 34 differents musculs da la fatscha. Oz è il di internaziunal da dar bitschs. E bitschs datti er insaquants fitg renumads.

Bitschar è sanadaivel - oz e il di internaziunal dal bitsch.
Legenda da maletgs: Bitschar è sanadaivel - oz e il di internaziunal dal bitsch. keystone

E tar ils pli renumads bitschs tutga per exempel gia in bitsch biblic, il bitsch da Judas. Quai è numnadamain stà il segn da Judas a las truppas dals autsacerdots per tradir Jesus - in bitsch.

Auters bitschs renumads èn per exempel l'emprim bitsch tranter ina persuna da pel stgira e da pel clera en la televisiun. Quai è stà en la seria da science fiction «Raumschiff Enterprise» l'onn 1968. En certs stadis dal sid dals Stadis Unids è quella episoda vegnida scumandada.

Enconuschent è er il «Bruderkuss» socialistic - il pli enconuschent probablamain quel tranter Leonid Breschnew e Erich Honecker cur che la DDR ha festivà ses 30avel. Il «Bruderkuss» era ina furma da salid e da reverenza tranter politichers socialistics che vegniva tgirada cunzunt tar visitas uffizialas ubain radunanzas da partida en il block da l'ost anteriur. Il «Bruderkuss» vala dapli che be scurlar il maun e duai demonstrar la colliaziun tranter stadis socialistics.

Autur/a: rtr/sb