Sch'i morda dapertut e sch'ins ha ultra da quai «vias» da pitschnas murdidas cotschnas sin il venter ubain sin il dies, lura pudess i esser ch'ins ha pidras da letg. Magari èn las pidras er vesaivlas. Ina pidra creschida plaina da sang po esser enfin in centimeter gronda. Ubain ch'ils excrements da las pidras èn vesaivels: pitschens tacs nairs per il pli sin la lattida. Sch'ins chatta pidras da letg èsi da clamar il profi, di Silvana von Bergen da la firma "Insekt-Killer" a Domat. Perquai che schizunt per els sco profis saja grev da mazzar tut las pidras da letg cun ina giada. Per far quai sprizza il cumbatta-parasits sco emprim in spray sin il letg e suenter lascha el in fim en chombra che chatscha or las pidras da letg.
Evitar ch'il parasit vegnia insumma en chombra sappian ins per exempel cun betg pachetar or la valisch da vacanzas sin il letg ubain en chombra, mabain per exempel en garascha. Lura lavar bain tut il resti e laschar la valisch vita in mument en in'autra stanza. Perche sche las pidras èn ina giada en chombra, sa derasan ellas svelt.
Sch'i morda dapertut - pidras da letg
En Svizra datti adina dapli pidras da letg. Er en il Grischun. Il motiv: Adina dapli glieud va en vacanzas e piglia cun sai ils parasits - cunzunt ord l'America.
Abunar
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
Parter