Pretschs da posta 2017 – bler vegn pli bunmartgà

Tranter auter na custa ina brev fin tschintg centimeters betg pli nov francs sc'in pachet, mabain a partir dal schaner 2017 èsi be pli da pajar in supplement da furma dad 1.50 CHF. Uschia custa la brev pli grossa 2.50 CHF.

Pretschs da posta 2017
Legenda da maletgs: Pretschs da posta 2017 Keystone

Sper la brev pli grossa vegn er la marca postala digitala via sms pli bunmartgada. A partir dal schaner custa ella tant sco la marca da pupi, pia in franc. Quai è il resultat d'ina cunvegnientscha tranter il survegliader da pretschs e la Posta Svizra.

La brev inscritta vegn tut tenor nua ch'ins dat si ella pli bunmartgada u pli chara. La differenza è dentant pitschna. Sch'ins trametta ella cun in barcode custa la brev inscritta 5.30 CHF. Datt'ins si ella al spurtegl custa ella 6.30 CHF.

Sper las midadas da pretschs datti da nov er il servetsch da posta a-plus per clients privats. Uschia pon er persunas privatas persequitar brevs betg inscrittas sur l'internet. Il servetsch custa per brevs pitschnas 3.50 CHF e per brevs a partir dal format B4 5.20 CHF.

Autur/a: RTR/ggf/ma