Gronda canera en l'entira Svizra

A partir da las 13:30 han lieu en l'entira Svizra tests da sirenas. Nus declerain tuns e consequenzas.

Oz, mesemna ils trais da favrer, han lieu ils tests da sirenas annuals. 7'800 sirenas en Svizra vegnan testads ed i vegn guardà sche tut funcziuna uschè sco ch'i stuess. Malauras sco quellas dal november 2002 han mussà, ch'igl è impurtant dad infurmar ed alarmar la populaziun. Da quella giada avevi dà suenter ferma precipitaziun grondas bovas a Schlans ed autras vischnancas en la Surselva.

Dus differents tuns da sirenas:

Sirena da privel general

Quel tun da sirena aud'ins normalmain. Quel va en sasez tar mintga privel per la populaziun sco per exempel bovas, inundaziuns ni era tar ina attatga pussibla.

Il tun da sirena va si ed engiu e sa repeta adina puspè (tun1).

L'uffizi federal da la protecziun da la protecziun recumonda:
- Tadlar radio per vegnir a savair il privel
- Obedir a las instrucziuns da la glieud da salvament
- Infurmar e gidar als vischins

Sirena da privel daua
Quel tun da sirena vegn be duvrà tar il privel sch'in mir da serra pudess rumper. Normalmain segua quel sin la sirena da privel general. En cas urgents sa quel tun dentant era gist vegnir immediat per betg perder memia bler temp. Tar il cas ch'in mir da serra rumpa, han ils abitants numnadamain savens mo paucas minutas temp per bandunar la zona da privel.

Quest tun da sirena e in tun constant che sa repeta adina puspè (tun 2).

L'uffizi federal da la protecziun da la protecziun recumonda:
- Immediat bandunar la zona da privel
- Sa cumportar tenor il plans d'evacuaziun local

Dapli infurmaziuns davart las zonas da privel ed il plans d'urgenza survegn'ins tar la vischnanca.

Infurmaziuns en general davart las sirenas e la situaziun actuala: naturgefahren.ch

Contribuziuns

Autur/a: RTR/cl