Er oz n’èsi betg simpel da bandunar las 05:00 mes letg uschè empernaivel chaud. Ma tuttina sto quai esser. Diavel! Igl è surtratg ed jau ma dumond pertge ch’jau n’hai betg prendì cun mai ina giacca si Mustér. Temperaturas chaudas? Denkste!
Il trot da la bun'ura
Durant l’emprim’oraziun hai jau da cumbatter cun la sien, hai da sfurzar mes egls da star avert. Mes sulet patratg: Insacura ch’jau hai gia filmà quest eveniment vegn jau a durmir enfin las set. Guardar sch’jau poss adina star si las tschintg...
L’ensolver è puspè il medem sco ier, jau prend il müesli ed in toc paun cun confitura e chaschiel. Tut separà natiralmain. Oz sun jau il davos che va ord il refectori. Janu, tge emporta quai schon.
Daventar pader na vi jau anc betg
Avant e suenter messa entaup jau adina puspè glieud da la claustra, saja quai paders, fraters, giasts u era collavuraturs. In pèr pleds qua, in pèr pleds là. E dad in mument sin l’auter ma sent jau spiertalmain bain qua en claustra. Ussa sun jau uschè lunsch ch’jau dumond era propi quai ch’jau lev dumandar, dentant senza daventar indiscret. Els s’interesseschan era per mai e mia lavur, quai che ma dat lura finalmain era il sentiment che la distanza tranter mai e la cuminanza benedictina sminuescha. Tge distanza? Jau na sai betg propi. En mintga cas ma sent jau bain qua, ma daventar pader n'è anc adina nagin tema per mai.
Powernap - e vinavant
Boa, sun jau stachel. Jau hai gist mangià gentar (er questa giada bun) e sun returnà en mia chombra. Spert importar las pli novas fotografias ed editar quellas. Jau ma sent corporalmain sco in kaugummi smatgà ensemen d'in da quels camiuns gronds. I resta nagut auter che far in powernap. Gist sa durmentà vegn puspè mes svegliarin. Quai n'èn doch betg stadas 30 minutas!?
Deplorablamain bain.
Enavos en ils tracts lungs ma dumond tge che sa zuppa davos questas portas. Intginas han ina tavletta da num suravia. Igl è cler tge che sa chatta là.
Ma lura restan tuttina anc uschè bleras portas ch'jau na less gnanc dumbrar ellas. Forsa less jau dentant insumma betg savair quai, lura mantegna quest cumplex ses misteri. E quai è forsa bun uschia.
«He, la tschaina è a fin», di il scalin
La vespra da las sis va puspè pli spert che quella d'ier, silmains hai jau quest sentiment. Ils paders e fraters che chantan fan quai betg adina medem spert. Ina giada cumeza insatgi pli baud, in'autra giada fa insatgi il davos tun pli ditg. Sch'igl è MEMIA baud u ditg na sai jau betg dir.
Durant la tschaina nua ch'ins na duess betg discurrer divertescha Frater Lucius cun ses commentaris. Oravant tut ha Avat Vigeli da rir, lura pitga el il scalin. Tuts èn puspè quiets. Ma betg ch'il scalin da l'Avat vess exnum la muntada da quietar - plitost per dir «He, la tschaina è a fin».
A quest punct finesch jau mes diari. Jau sper ch'jau poss durmir oz in pau dapli.