La grondezza da ses spazi da lavur fa numnadamain vegnir sblatg mintga CEO – il spazi da lavur da l’astrofisicher Thomas Zurbuchen è l’univers. Quai dentant betg be sco scienzià, quai fissan puspè blers, ma vairamain sco in dals chaus principals dad ina firma.
Il Svizzer è l’anteriur directur scientific da la NASA. Durant sis onns è el stà il directur scientific da l’agenzia astronautica dals Stadis Unids. Ussa dat el vinavant sia passiun a l’ETH a Turitg.
Perscrutader passiunà e maister da discurrer en maletgs
Thomas Zurbuchen n’é betg be astrofisicher da format mundial, ma er in maister da maletgs e decleraziuns adattadas a ses public. Sch’in sco el di ch’ins possa s'imaginar l’univers «in zic sco in batlini sgrufignà», bain en quatter dimensiuns, ma tuttina – lura pon ins era crair quai.
A propos crair – en ses discurs cun la Vita e cretta na raquinta l’astrofisicher betg be da las dimensiuns da l’infinitad fisica, ma era da las dimensiuns filosoficas e religiusas.
Il tschiel – là nua ch'ils anghels abitan, u betg, Thomas Zurbuchen?
L’idea dal tschiel sco dachasa dad anghels e Dieu na saja betg ester ad el – anzi, uschia saja el creschì si. Il mattet da Heiligenschwendi haja sa smirveglià cun guardar si per il tschiel stailì savens, sch’i dettia er insanua ina mattetta u in mattet che guarda enavos, en sia direcziun. Sco directur scientific da la NASA, da l’agenzia astronauticas dals Stadis Units è el sa mess suenter per propi sin ils fastizs da vita en l’univers.
Thomas Zurbuchen raquinta era, co che la fascinaziun ha cumenzà ina giada ils onns 1970 cun guardar sco mattet en il tschel da notg en sia patria Heiligenschwendi. E co che tut è anc bler pli grond e vast che perfin el, suenter divers onns da perscrutaziun scientifica sin pli aut niveau, possia sa metter avant.
