Quest album cuntegna era la chanzun “la pura”. Per la musica da pop rumantscha è “la pura” in term impurtant. Corin Curschellas prenda ina poesia Gion Cadieli che descriva la dira vita da pura, ina vita idealisada en la poesia. Ordlonder fa Curschellas ina chanzun che pudess vegnir cataloghisada da “etno-pop”. Ina revoluziun en la musica rumantscha!
Il 1995 cumpara il segund album solo da Corin Curschellas: “Rappa Nomada”.
Per Corin Curschellas èsi temp da sa laschar inspirar d’ina ulteriura metropola: il 1995 parta ella per viver a New York.
Là registrescha ella “Valdun” (1997), l’emprim da ses albums che cuntegna exclusivamain chanzuns rumantschas.
Sin “Valdun” sa chatta era la “Chanzun da Sontga Margriata”, questa chanzun che vala sco pli veglia chanzun rumantscha. L’interpretaziun da Corin Curschellas è singulara e persunala, ozendi dastg’ins senz’auter pretender che quest’interpretaziun moderna ha manà ad ina spezia da “revival” da questa chanzun populara.
Versiun live da la chanzun da sontga Margriata or dal 2011
Il 1998 turna Corin Curschellas a Paris, nua ch’ella registrescha “Goodbye Gary Cooper”, ses quart album da solo. Quest album plain colurs e plaschair d’experimentar cuntegna chanzuns en englais, rumantsch (grischun) e franzos.
Il 2000 cumpara “Sud des Alpes” – in album nua che chanzuns popularas sa maschaidan cun jazz, nua che “pop” rumantsch sa maschaida cun tuns africans e nua che Corin Curschellas viagia chantond da la Langstrasse enfin en il Senegal.
En l’ovra da Corin Curschellas chattain nus adina puspè novas interpretaziuns da chanzuns popularas rumantschas, uschia era sin “Sud des Alpes”.