Crema da sulegl e galoschas
Sco quasi mintg’onn vegni er quest onn bletsch a Degen. Plievgia, nivels e sulegl – i dat in zic dal tut, uschia Jürg Zogg dad SRF Meteo.
I dat fasas suleglivas pli lungas, dentant tranteren er nivels gross cun in u l’auter uradi. Er n’èsi betg gist chalurs, i dat maximalmain 22 grads. La notg datti mo 10 fin 12 grads.
Igl è pia da pachetar en la crema da sulegl, la pelerina ed er la giacca chauda. Il pli bel di è tenor Jürg Zogg la gievgia. Il pli bletsch il venderdi. Sonda datti lura in mix da sulegl e nivlas cun in u l’auter uradi. La dumengia vegni lura puspè pli bel.
Uss mancha mo anc il public
D'organisar in entir festival dovra blera lavur. I dovra ina tribuna, installaziuns sanitaras, purschidas da mangiar e da baiver, glischs, ina plazza da campar e blera segirezza. Quai è ina gronda organisaziun.
Curdin Derungs è ensemen cun ses collega Rino Caviezel in dals dus responsabels per l’infrastructura dal Open Air Lumnezia. El fa ina guida per nus tras il areal dal festival che è entamez las preparaziuns.
Dapli l’emna passada, il glindesdi, ils 10 da fanadur, èn els vi da bajegiar ed installar ils indrizs per il festival. I dat dentant era uss anc bler da far, las difficultads sajan oravant tut en ils detagls.
Sco che Curdin Derungs di dentant, duessi betg esser in problem da dumagnar a fin tut enfin gievgia. Tut las impurtantas chaussas sco las bars, la tribuna, ils stans da mangiar ed uschia vinavant duessan dentant star enfin mesemna saira. Per il mument para quella finamira cuntanschibla: els lavuran durant il di cun 10 voluntaris e voluntarias e la saira èn mintgamai var 25 persunas a preparar e gidar.
Cun RTR live a Degen
La gievgia è sa sviluppada da la festa indigena ad in di svizzer. Il Line Up da la saira porscha cumplainamain musicistas e musicists naziunals – e quels pudais era giudair tar vus en stiva cun noss livestream.
Per la 37avla giada ha il festival en Lumnezia lieu. Per la segunda giada faschain nus in livestream da la gievgia saira ils 20 da zercladur a partir da las 19:30. Sin la tribuna gronda sa preschentan newcomers sco era artistas ed artists etablids.
Ils novs
Ils concerts cumenzan cun il duo grischun da pop electronic «ladunna». Chiara Jacomet e Momo Kawazoe fetschian musica da dunnas per carstgauns. Pia è in e scadin bainvesì davant tribuna per lur premiera sin tribuna gronda.
Tut auters tuns vegni a dar suenter dal collectiv musical «2kmafia». Per ils sis rappers da Son Gagl èn lur nums d’artists pli impurtants ch’ils nums civils: noah2k, Gana94, T-God, Skinny, Scem e Madflow.
Cun il terz restain en il Son Gagl, midain dentant gener. «Unlsh» numnan lur musica «Melodic Dramacore» tge che saja «Metalcore» – in sut-gener dal rock dir cun ina buna presa drama. Cun quella maschaida han els gudagnà il bandXost 2022.
Ils etablids
Lungs viadis n’èn nagin problem per «Sam Himself» da Basilea. Dapi onns pendulescha el tranter Basilea e New York. Quest onn è el per l’emprima giada enta Degen per preschentar sia musica d’indie melanconica.
Per buna luna e muments da sautar procura silsuenter la vallesana Stefanie Heinzmann. Avant 11 onns ha ella l’ultima giada barattà ils culms vallesans per ils grischuns – almain per ina fin d’emna.
Breitbild da Cuira savessan ins gia numnar veterans. Ils rappers èn gia per la 5avla giada a l’Open Air Lumnezia e vegnan a procurar per il punct final da la gievgia.
Or da l'archiv:
