Siglir tar il cuntegn

Header

cuntegn

Open Air Lumnezia Las bands da la gievgia vegnan a pled en Lumnezia

Mintg'onn a l'Open Air Lumnezia èn preschents numerus musicists da l'entir mund. E sco mintg'onn avain nus dumondas sur dumondas. Qua las respostas da Marius, Giganto & Mattiu, Delirious Mob Crew, No Future e Liricas Analas.

Marius Bär

L’ediziun 2016 da l'Open Air Lumnezia è la terza ch’il giuven e simpatic chantautur da l'Appenzell ha visità.

Marius en discurs cun Danilo Bavier.
Legenda: Marius (san.) en discurs cun Danilo Bavier (dre.). RTR, Flavio Tuor

Cumenzà ha l’istorgia OAL dal fitg talentà musicist avant trais onns. Là ha el visità per l’emprima giada la Val Lumnezia sco visitader da l’open air.

L’onn passà è el turnà per lavurar davos ina bar dal pli grond festival Grischun. E quest onn – gea tut las bunas chaussas èn propi trais – stat el gia sin la tribuna pitschna da la gievgia.

Giganto & Mattiu

Giganto e Mattiu èn dus giuvens rumantschs che fan dapi bun in onn musica ensemen.

Giganto e Mattiu en visita tar Sergio Guetg.
Legenda: Giganto e Mattiu (dre.) en visita tar Sergio Guetg (san.). RTR, Dominik Hardegger

Els èn fitg engaschads, ambizius e sa passan cun gronds pass da palc tar palc da differentas occurrenzas en la Svizra Orientala. Tgenin’autra band che Giganto & Mattiu pudessan quels chavazzins descriver? Uschia è para il proxim pass er in fitg logic – Giganto & Mattiu sunan a l’Open Air Lumnezia.

Delirious Mob Crew

Els èn tuts tranter 17 e 21 e fan musica cun passiun ed ambiziun. Ina giuvna band dal chantun Turgovia dat gas!

Jachen Prevost (dre.) ha anc intginas dumondas per Aaron Berliat e Jonathan Sachweh (san.) da Delirious Mob Crew.
Legenda: Jachen Prevost (dre.) ha anc intginas dumondas per Aaron e Jonathan (san.). RTR, Flavio Tuor

Er sche lur band exista pir dapi bunamain in onn han els gia gudagnà divers contest en la Svizra Orientala – ed oz han els mussà lur energia sin il palc da talents da l’Open Air Lumnezia.

Il chantadur Aaron Berliat ed il ghitarrist Jonathan Sachweh èn stà suneter lur concert per ina intervista tar RTR.

No Future

Els èn stads la gievgia sper las Liricas Analas in dals matadors locals cun ina lung’istorgia sco band.

No Future en noss bus durant l'intervista.
Legenda: No Future en noss bus durant l'intervista. RTR, Dominik Hardegger

Cun ina fulminanta ed intensiva performance n’han els betg mo persvas ils visitaders – na, els han per propi dà «vollgas» è cun els era il public. I è vegni sautà, chantà e siglì che la terra tremblava.

Liricas Analas

Las Liricas Analas – la primavaira da return cun lur 5avel disc «Banalitad» – e puspè sin il palc da l’Open Air Lumenzia

Flepp ed Orange (san.) da las Liricas Analas cun Jachen Prevost (dre.).
Legenda: Flepp ed Orange (san.) da las Liricas Analas cun Jachen Prevost (dre.). RTR, Flavio Tuor

Flepp, Orange, Jusht e Suivez èn per la quarta giada a l’Open Air Lumnezia. Quai è lur festival «da chasa» ed adina in eveniment special er sch’els èn gia sa preschentads tar festivals pli gronds sco Son Gagl, Gurten e Frauenfeld.

Avant lur concert a Degen han els raquinta a Jachen Prevost davart las reacziuns sin lur disc nov, lur clip da video cun suttext chinais e davart lur return en Lumnezia.

Artitgels legids il pli savens