Per artistas ed artists è la libertad d'art sontga. E per il mument è ella er en privel. Persunas activas sin il champ cultural en la chapitala tudestga Berlin sa fan actualmain quitads pervi da la libertad d'art.
Tgi che vul survegnir daners per promover la cultura a Berlin sto numnadamain s'engaschar uffizialmain cunter la discriminaziun e cunter l'antisemitissem e suttascriver ina clausula correspundenta. Quai chè manegià bain, fa stremblir ils fundaments da la libertad d'art.
Cunquai ch'igl ha dà gronda opposiziun, èn ins puspè sa distanzià d'ina tala directiva – quai è vegnì enconuschent mardi passà. «L'art ha era l'incumbensa da metter en discussiun tschertas tematicas, gist era sche quellas èn criticas e dispitaivlas», uschia commentescha Schena.
Il cas ha era manà ad ina nova discussiun en Svizra, nua che la libertad d'art è dapi l'onn 1999 in dretg constituziunal. Tge dastga l'art? Ha la libertad d'art cunfins? E sche gea, nua chala la libertad d'art?
Dapi passa dus decennis fa Esther Schena part da la scena d'art svizra – ella è artista e serigrafa. Cun Vita e cretta discutescha ella quant lunsch ch'ella va cun ses art, sche quel duess alarmar u provocar. Quanta pussanza ch'ella sco artista ha da ses public e cura che ses art è politic.
